1 vnumber="1"> וישב יעקב בארץ מגורי אביו--בארץ כנען
2 vnumber="2"> אלה תלדות יעקב יוסף בן שבע עשרה שנה היה רעה את אחיו בצאן והוא נער את בני בלהה ואת בני זלפה נשי אביו ויבא יוסף את דבתם רעה אל אביהם
3 vnumber="3"> וישראל אהב את יוסף מכל בניו--כי בן זקנים הוא לו ועשה לו כתנת פסים
4 vnumber="4"> ויראו אחיו כי אתו אהב אביהם מכל אחיו--וישנאו אתו ולא יכלו דברו לשלם
5 vnumber="5"> ויחלם יוסף חלום ויגד לאחיו ויוספו עוד שנא אתו
6 vnumber="6"> ויאמר אליהם שמעו נא החלום הזה אשר חלמתי
7 vnumber="7"> והנה אנחנו מאלמים אלמים בתוך השדה והנה קמה אלמתי וגם נצבה והנה תסבינה אלמתיכם ותשתחוין לאלמתי
8 vnumber="8"> ויאמרו לו אחיו המלך תמלך עלינו אם משול תמשל בנו ויוספו עוד שנא אתו על חלמתיו ועל דבריו
9 vnumber="9"> ויחלם עוד חלום אחר ויספר אתו לאחיו ויאמר הנה חלמתי חלום עוד והנה השמש והירח ואחד עשר כוכבים משתחוים לי
10 vnumber="10"> ויספר אל אביו ואל אחיו ויגער בו אביו ויאמר לו מה החלום הזה אשר חלמת הבוא נבוא אני ואמך ואחיך להשתחות לך ארצה
11 vnumber="11"> ויקנאו בו אחיו ואביו שמר את הדבר
12 vnumber="12"> וילכו אחיו לרעות את צאן אביהם בשכם
13 vnumber="13"> ויאמר ישראל אל יוסף הלוא אחיך רעים בשכם--לכה ואשלחך אליהם ויאמר לו הנני
14 vnumber="14"> ויאמר לו לך נא ראה את שלום אחיך ואת שלום הצאן והשבני דבר וישלחהו מעמק חברון ויבא שכמה
15 vnumber="15"> וימצאהו איש והנה תעה בשדה וישאלהו האיש לאמר מה תבקש
16 vnumber="16"> ויאמר את אחי אנכי מבקש הגידה נא לי איפה הם רעים
17 vnumber="17"> ויאמר האיש נסעו מזה--כי שמעתי אמרים נלכה דתינה וילך יוסף אחר אחיו וימצאם בדתן
18 vnumber="18"> ויראו אתו מרחק ובטרם יקרב אליהם ויתנכלו אתו להמיתו
19 vnumber="19"> ויאמרו איש אל אחיו הנה בעל החלמות הלזה--בא
20 vnumber="20"> ועתה לכו ונהרגהו ונשלכהו באחד הברות ואמרנו חיה רעה אכלתהו ונראה מה יהיו חלמתיו
21 vnumber="21"> וישמע ראובן ויצלהו מידם ויאמר לא נכנו נפש
22 vnumber="22"> ויאמר אלהם ראובן אל תשפכו דם--השליכו אתו אל הבור הזה אשר במדבר ויד אל תשלחו בו למען הציל אתו מידם להשיבו אל אביו
23 vnumber="23"> ויהי כאשר בא יוסף אל אחיו ויפשיטו את יוסף את כתנתו את כתנת הפסים אשר עליו
24 vnumber="24"> ויקחהו--וישלכו אתו הברה והבור רק אין בו מים
25 vnumber="25"> וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולט--הולכים להוריד מצרימה
26 vnumber="26"> ויאמר יהודה אל אחיו מה בצע כי נהרג את אחינו וכסינו את דמו
27 vnumber="27"> לכו ונמכרנו לישמעאלים וידנו אל תהי בו כי אחינו בשרנו הוא וישמעו אחיו
28 vnumber="28"> ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה
29 vnumber="29"> וישב ראובן אל הבור והנה אין יוסף בבור ויקרע את בגדיו
30 vnumber="30"> וישב אל אחיו ויאמר הילד איננו ואני אנה אני בא
31 vnumber="31"> ויקחו את כתנת יוסף וישחטו שעיר עזים ויטבלו את הכתנת בדם
32 vnumber="32"> וישלחו את כתנת הפסים ויביאו אל אביהם ויאמרו זאת מצאנו הכר נא הכתנת בנך הוא--אם לא
33 vnumber="33"> ויכירה ויאמר כתנת בני חיה רעה אכלתהו טרף טרף יוסף
34 vnumber="34"> ויקרע יעקב שמלתיו וישם שק במתניו ויתאבל על בנו ימים רבים
35 vnumber="35"> ויקמו כל בניו וכל בנתיו לנחמו וימאן להתנחם ויאמר כי ארד אל בני אבל שאלה ויבך אתו אביו
36 vnumber="36"> והמדנים--מכרו אתו אל מצרים לפוטיפר סריס פרעה שר הטבחים {פ}
art="x-p"/>