1 vnumber="1"> ויעל משה מערבת מואב אל הר נבו ראש הפסגה אשר על פני ירחו ויראהו יהוה את כל הארץ את הגלעד עד דן
2 vnumber="2"> ואת כל נפתלי ואת ארץ אפרים ומנשה ואת כל ארץ יהודה עד הים האחרון
3 vnumber="3"> ואת הנגב ואת הככר בקעת ירחו עיר התמרים--עד צער
4 vnumber="4"> ויאמר יהוה אליו זאת הארץ אשר נשבעתי לאברהם ליצחק וליעקב לאמר לזרעך אתננה הראיתיך בעיניך ושמה לא תעבר
5 vnumber="5"> וימת שם משה עבד יהוה בארץ מואב--על פי יהוה
6 vnumber="6"> ויקבר אתו בגי בארץ מואב מול בית פעור ולא ידע איש את קברתו עד היום הזה
7 vnumber="7"> ומשה בן מאה ועשרים שנה--במתו לא כהתה עינו ולא נס לחה
8 vnumber="8"> ויבכו בני ישראל את משה בערבת מואב שלשים יום ויתמו ימי בכי אבל משה
9 vnumber="9"> ויהושע בן נון מלא רוח חכמה--כי סמך משה את ידיו עליו וישמעו אליו בני ישראל ויעשו כאשר צוה יהוה את משה
10 vnumber="10"> ולא קם נביא עוד בישראל כמשה אשר ידעו יהוה פנים אל פנים
11 vnumber="11"> לכל האתת והמופתים אשר שלחו יהוה לעשות בארץ מצרים--לפרעה ולכל עבדיו ולכל ארצו
12 vnumber="12"> ולכל היד החזקה ולכל המורא הגדול אשר עשה משה לעיני כל ישראל {ש}
art="x-p"/>