1 vnumber="1"> וירא יעקב כי יש שבר במצרים ויאמר יעקב לבניו למה תתראו
2 vnumber="2"> ויאמר--הנה שמעתי כי יש שבר במצרים רדו שמה ושברו לנו משם ונחיה ולא נמות
3 vnumber="3"> וירדו אחי יוסף עשרה לשבר בר ממצרים
4 vnumber="4"> ואת בנימין אחי יוסף לא שלח יעקב את אחיו כי אמר פן יקראנו אסון
5 vnumber="5"> ויבאו בני ישראל לשבר בתוך הבאים כי היה הרעב בארץ כנען
6 vnumber="6"> ויוסף הוא השליט על הארץ--הוא המשביר לכל עם הארץ ויבאו אחי יוסף וישתחוו לו אפים ארצה
7 vnumber="7"> וירא יוסף את אחיו ויכרם ויתנכר אליהם וידבר אתם קשות ויאמר אלהם מאין באתם ויאמרו מארץ כנען לשבר אכל
8 vnumber="8"> ויכר יוסף את אחיו והם לא הכרהו
9 vnumber="9"> ויזכר יוסף--את החלמות אשר חלם להם ויאמר אלהם מרגלים אתם לראות את ערות הארץ באתם
10 vnumber="10"> ויאמרו אליו לא אדני ועבדיך באו לשבר אכל
11 vnumber="11"> כלנו בני איש אחד נחנו כנים אנחנו לא היו עבדיך מרגלים
12 vnumber="12"> ויאמר אלהם לא כי ערות הארץ באתם לראות
13 vnumber="13"> ויאמרו שנים עשר עבדיך אחים אנחנו בני איש אחד--בארץ כנען והנה הקטן את אבינו היום והאחד איננו
14 vnumber="14"> ויאמר אלהם יוסף הוא אשר דברתי אלכם לאמר--מרגלים אתם
15 vnumber="15"> בזאת תבחנו חי פרעה אם תצאו מזה כי אם בבוא אחיכם הקטן הנה
16 vnumber="16"> שלחו מכם אחד ויקח את אחיכם ואתם האסרו ויבחנו דבריכם האמת אתכם ואם לא--חי פרעה כי מרגלים אתם
17 vnumber="17"> ויאסף אתם אל משמר שלשת ימים
18 vnumber="18"> ויאמר אלהם יוסף ביום השלישי זאת עשו וחיו את האלהים אני ירא
19 vnumber="19"> אם כנים אתם--אחיכם אחד יאסר בבית משמרכם ואתם לכו הביאו שבר רעבון בתיכם
20 vnumber="20"> ואת אחיכם הקטן תביאו אלי ויאמנו דבריכם ולא תמותו ויעשו כן
21 vnumber="21"> ויאמרו איש אל אחיו אבל אשמים אנחנו על אחינו אשר ראינו צרת נפשו בהתחננו אלינו ולא שמענו על כן באה אלינו הצרה הזאת
22 vnumber="22"> ויען ראובן אתם לאמר הלוא אמרתי אליכם לאמר אל תחטאו בילד--ולא שמעתם וגם דמו הנה נדרש
23 vnumber="23"> והם לא ידעו כי שמע יוסף כי המליץ בינתם
24 vnumber="24"> ויסב מעליהם ויבך וישב אלהם וידבר אלהם ויקח מאתם את שמעון ויאסר אתו לעיניהם
25 vnumber="25"> ויצו יוסף וימלאו את כליהם בר ולהשיב כספיהם איש אל שקו ולתת להם צדה לדרך ויעש להם כן
26 vnumber="26"> וישאו את שברם על חמריהם וילכו משם
27 vnumber="27"> ויפתח האחד את שקו לתת מספוא לחמרו--במלון וירא את כספו והנה הוא בפי אמתחתו
28 vnumber="28"> ויאמר אל אחיו הושב כספי וגם הנה באמתחתי ויצא לבם ויחרדו איש אל אחיו לאמר מה זאת עשה אלהים לנו
29 vnumber="29"> ויבאו אל יעקב אביהם ארצה כנען ויגידו לו את כל הקרת אתם לאמר
30 vnumber="30"> דבר האיש אדני הארץ אתנו--קשות ויתן אתנו כמרגלים את הארץ
31 vnumber="31"> ונאמר אליו כנים אנחנו לא היינו מרגלים
32 vnumber="32"> שנים עשר אנחנו אחים בני אבינו האחד איננו והקטן היום את אבינו בארץ כנען
33 vnumber="33"> ויאמר אלינו האיש אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו
34 vnumber="34"> והביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו
35 vnumber="35"> ויהי הם מריקים שקיהם והנה איש צרור כספו בשקו ויראו את צררות כספיהם המה ואביהם--וייראו
36 vnumber="36"> ויאמר אלהם יעקב אביהם אתי שכלתם יוסף איננו ושמעון איננו ואת בנימן תקחו עלי היו כלנה
37 vnumber="37"> ויאמר ראובן אל אביו לאמר את שני בני תמית אם לא אביאנו אליך תנה אתו על ידי ואני אשיבנו אליך
38 vnumber="38"> ויאמר לא ירד בני עמכם כי אחיו מת והוא לבדו נשאר וקראהו אסון בדרך אשר תלכו בה והורדתם את שיבתי ביגון שאולה
art="x-p"/>