1 vnumber="1"> וידבר יהוה אל משה לאמר
2 vnumber="2"> דבר אל בני ישראל ואמרת אלהם איש או אשה כי יפלא לנדר נדר נזיר--להזיר ליהוה
3 vnumber="3"> מיין ושכר יזיר חמץ יין וחמץ שכר לא ישתה וכל משרת ענבים לא ישתה וענבים לחים ויבשים לא יאכל
4 vnumber="4"> כל ימי נזרו מכל אשר יעשה מגפן היין מחרצנים ועד זג--לא יאכל
5 vnumber="5"> כל ימי נדר נזרו תער לא יעבר על ראשו עד מלאת הימם אשר יזיר ליהוה קדש יהיה--גדל פרע שער ראשו
6 vnumber="6"> כל ימי הזירו ליהוה על נפש מת לא יבא
7 vnumber="7"> לאביו ולאמו לאחיו ולאחתו--לא יטמא להם במתם כי נזר אלהיו על ראשו
8 vnumber="8"> כל ימי נזרו קדש הוא ליהוה
9 vnumber="9"> וכי ימות מת עליו בפתע פתאם וטמא ראש נזרו--וגלח ראשו ביום טהרתו ביום השביעי יגלחנו
10 vnumber="10"> וביום השמיני יבא שתי תרים או שני בני יונה אל הכהן--אל פתח אהל מועד
11 vnumber="11"> ועשה הכהן אחד לחטאת ואחד לעלה וכפר עליו מאשר חטא על הנפש וקדש את ראשו ביום ההוא
12 vnumber="12"> והזיר ליהוה את ימי נזרו והביא כבש בן שנתו לאשם והימים הראשנים יפלו כי טמא נזרו
13 vnumber="13"> וזאת תורת הנזיר ביום מלאת ימי נזרו יביא אתו אל פתח אהל מועד
14 vnumber="14"> והקריב את קרבנו ליהוה כבש בן שנתו תמים אחד לעלה וכבשה אחת בת שנתה תמימה לחטאת ואיל אחד תמים לשלמים
15 vnumber="15"> וסל מצות סלת חלת בלולת בשמן ורקיקי מצות משחים בשמן ומנחתם ונסכיהם
16 vnumber="16"> והקריב הכהן לפני יהוה ועשה את חטאתו ואת עלתו
17 vnumber="17"> ואת האיל יעשה זבח שלמים ליהוה על סל המצות ועשה הכהן את מנחתו ואת נסכו
18 vnumber="18"> וגלח הנזיר פתח אהל מועד--את ראש נזרו ולקח את שער ראש נזרו ונתן על האש אשר תחת זבח השלמים
19 vnumber="19"> ולקח הכהן את הזרע בשלה מן האיל וחלת מצה אחת מן הסל ורקיק מצה אחד ונתן על כפי הנזיר אחר התגלחו את נזרו
20 vnumber="20"> והניף אותם הכהן תנופה לפני יהוה--קדש הוא לכהן על חזה התנופה ועל שוק התרומה ואחר ישתה הנזיר יין
21 vnumber="21"> זאת תורת הנזיר אשר ידר קרבנו ליהוה על נזרו מלבד אשר תשיג ידו כפי נדרו אשר ידר--כן יעשה על תורת נזרו {פ}
art="x-p"/>
22 vnumber="22"> וידבר יהוה אל משה לאמר
23 vnumber="23"> דבר אל אהרן ואל בניו לאמר כה תברכו את בני ישראל אמור להם {ס}
art="x-p"/>
24 vnumber="24"> יברכך יהוה וישמרך {ס}
art="x-p"/>
25 vnumber="25"> יאר יהוה פניו אליך ויחנך {ס}
art="x-p"/>
26 vnumber="26"> ישא יהוה פניו אליך וישם לך שלום {ס}
art="x-p"/>
27 vnumber="27"> ושמו את שמי על בני ישראל ואני אברכם {ס}
art="x-p"/>