1 vnumber="1"> ואברהם זקן בא בימים ויהוה ברך את אברהם בכל
2 vnumber="2"> ויאמר אברהם אל עבדו זקן ביתו המשל בכל אשר לו שים נא ידך תחת ירכי
3 vnumber="3"> ואשביעך--ביהוה אלהי השמים ואלהי הארץ אשר לא תקח אשה לבני מבנות הכנעני אשר אנכי יושב בקרבו
4 vnumber="4"> כי אל ארצי ואל מולדתי תלך ולקחת אשה לבני ליצחק
5 vnumber="5"> ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם
6 vnumber="6"> ויאמר אליו אברהם השמר לך פן תשיב את בני שמה
7 vnumber="7"> יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת--הוא ישלח מלאכו לפניך ולקחת אשה לבני משם
8 vnumber="8"> ואם לא תאבה האשה ללכת אחריך--ונקית משבעתי זאת רק את בני לא תשב שמה
9 vnumber="9"> וישם העבד את ידו תחת ירך אברהם אדניו וישבע לו על הדבר הזה
10 vnumber="10"> ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים--אל עיר נחור
11 vnumber="11"> ויברך הגמלים מחוץ לעיר אל באר המים לעת ערב לעת צאת השאבת
12 vnumber="12"> ויאמר--יהוה אלהי אדני אברהם הקרה נא לפני היום ועשה חסד עם אדני אברהם
13 vnumber="13"> הנה אנכי נצב על עין המים ובנות אנשי העיר יצאת לשאב מים
14 vnumber="14"> והיה הנער אשר אמר אליה הטי נא כדך ואשתה ואמרה שתה וגם גמליך אשקה--אתה הכחת לעבדך ליצחק ובה אדע כי עשית חסד עם אדני
15 vnumber="15"> ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה
16 vnumber="16"> והנער טבת מראה מאד--בתולה ואיש לא ידעה ותרד העינה ותמלא כדה ותעל
17 vnumber="17"> וירץ העבד לקראתה ויאמר הגמיאיני נא מעט מים מכדך
18 vnumber="18"> ותאמר שתה אדני ותמהר ותרד כדה על ידה--ותשקהו
19 vnumber="19"> ותכל להשקתו ותאמר גם לגמליך אשאב עד אם כלו לשתת
20 vnumber="20"> ותמהר ותער כדה אל השקת ותרץ עוד אל הבאר לשאב ותשאב לכל גמליו
21 vnumber="21"> והאיש משתאה לה מחריש--לדעת ההצליח יהוה דרכו אם לא
22 vnumber="22"> ויהי כאשר כלו הגמלים לשתות ויקח האיש נזם זהב בקע משקלו--ושני צמידים על ידיה עשרה זהב משקלם
23 vnumber="23"> ויאמר בת מי את הגידי נא לי היש בית אביך מקום לנו ללין
24 vnumber="24"> ותאמר אליו בת בתואל אנכי--בן מלכה אשר ילדה לנחור
25 vnumber="25"> ותאמר אליו גם תבן גם מספוא רב עמנו--גם מקום ללון
26 vnumber="26"> ויקד האיש וישתחו ליהוה
27 vnumber="27"> ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני
28 vnumber="28"> ותרץ הנער ותגד לבית אמה--כדברים האלה
29 vnumber="29"> ולרבקה אח ושמו לבן וירץ לבן אל האיש החוצה אל העין
30 vnumber="30"> ויהי כראת את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין
31 vnumber="31"> ויאמר בוא ברוך יהוה למה תעמד בחוץ ואנכי פניתי הבית ומקום לגמלים
32 vnumber="32"> ויבא האיש הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשים אשר אתו
33 vnumber="33"> ויישם (ויושם) לפניו לאכל ויאמר לא אכל עד אם דברתי דברי ויאמר דבר
34 vnumber="34"> ויאמר עבד אברהם אנכי
35 vnumber="35"> ויהוה ברך את אדני מאד--ויגדל ויתן לו צאן ובקר וכסף וזהב ועבדם ושפחת וגמלים וחמרים
36 vnumber="36"> ותלד שרה אשת אדני בן לאדני אחרי זקנתה ויתן לו את כל אשר לו
37 vnumber="37"> וישבעני אדני לאמר לא תקח אשה לבני מבנות הכנעני אשר אנכי ישב בארצו
38 vnumber="38"> אם לא אל בית אבי תלך ואל משפחתי ולקחת אשה לבני
39 vnumber="39"> ואמר אל אדני אלי לא תלך האשה אחרי
40 vnumber="40"> ויאמר אלי יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי
41 vnumber="41"> אז תנקה מאלתי כי תבוא אל משפחתי ואם לא יתנו לך והיית נקי מאלתי
42 vnumber="42"> ואבא היום אל העין ואמר יהוה אלהי אדני אברהם אם ישך נא מצליח דרכי אשר אנכי הלך עליה
43 vnumber="43"> הנה אנכי נצב על עין המים והיה העלמה היצאת לשאב ואמרתי אליה השקיני נא מעט מים מכדך
44 vnumber="44"> ואמרה אלי גם אתה שתה וגם לגמליך אשאב--הוא האשה אשר הכיח יהוה לבן אדני
45 vnumber="45"> אני טרם אכלה לדבר אל לבי והנה רבקה יצאת וכדה על שכמה ותרד העינה ותשאב ואמר אליה השקיני נא
46 vnumber="46"> ותמהר ותורד כדה מעליה ותאמר שתה וגם גמליך אשקה ואשת וגם הגמלים השקתה
47 vnumber="47"> ואשאל אתה ואמר בת מי את ותאמר בת בתואל בן נחור אשר ילדה לו מלכה ואשם הנזם על אפה והצמידים על ידיה
48 vnumber="48"> ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו
49 vnumber="49"> ועתה אם ישכם עשים חסד ואמת את אדני--הגידו לי ואם לא--הגידו לי ואפנה על ימין או על שמאל
50 vnumber="50"> ויען לבן ובתואל ויאמרו מיהוה יצא הדבר לא נוכל דבר אליך רע או טוב
51 vnumber="51"> הנה רבקה לפניך קח ולך ותהי אשה לבן אדניך כאשר דבר יהוה
52 vnumber="52"> ויהי כאשר שמע עבד אברהם את דבריהם וישתחו ארצה ליהוה
53 vnumber="53"> ויוצא העבד כלי כסף וכלי זהב ובגדים ויתן לרבקה ומגדנת--נתן לאחיה ולאמה
54 vnumber="54"> ויאכלו וישתו הוא והאנשים אשר עמו--וילינו ויקומו בבקר ויאמר שלחני לאדני
55 vnumber="55"> ויאמר אחיה ואמה תשב הנער אתנו ימים או עשור אחר תלך
56 vnumber="56"> ויאמר אלהם אל תאחרו אתי ויהוה הצליח דרכי שלחוני ואלכה לאדני
57 vnumber="57"> ויאמרו נקרא לנער ונשאלה את פיה
58 vnumber="58"> ויקראו לרבקה ויאמרו אליה התלכי עם האיש הזה ותאמר אלך
59 vnumber="59"> וישלחו את רבקה אחתם ואת מנקתה ואת עבד אברהם ואת אנשיו
60 vnumber="60"> ויברכו את רבקה ויאמרו לה--אחתנו את היי לאלפי רבבה ויירש זרעך את שער שנאיו
61 vnumber="61"> ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך
62 vnumber="62"> ויצחק בא מבוא באר לחי ראי והוא יושב בארץ הנגב
63 vnumber="63"> ויצא יצחק לשוח בשדה לפנות ערב וישא עיניו וירא והנה גמלים באים
64 vnumber="64"> ותשא רבקה את עיניה ותרא את יצחק ותפל מעל הגמל
65 vnumber="65"> ותאמר אל העבד מי האיש הלזה ההלך בשדה לקראתנו ויאמר העבד הוא אדני ותקח הצעיף ותתכס
66 vnumber="66"> ויספר העבד ליצחק את כל הדברים אשר עשה
67 vnumber="67"> ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו {פ}
art="x-p"/>