1 рмЕрмирмирнНрмдрм░ рм╕рмжрм╛рмкрнНрм░рмнрнБ рморнЗрм╛рм╢рм╛рмЩрнНрмХрнБ рмХрм╣рм┐рм▓рнЗ,
2 рмдрнБрморнНрмнрнЗ рмЗрм╕рнНрм░рм╛рмПрм▓-рм╕рмирнНрмдрм╛рмирмЧрмгрмХрнБ рмХрмерм╛ рмХрнБрм╣, рм╕рнЗрморм╛рмирмЩрнНрмХ рмкрм┐рмдрнГрмЧрнГрм╣рм░ рмЕрмзрнНрнЯрмХрнНрм╖рморм╛рмирмЩрнНрмХрмарм╛рм░рнБ рмкрнНрм░рмдрнНрнЯрнЗрмХ рмкрм┐рмдрнГрмЧрнГрм╣ рмирм┐рмормирнНрмдрнЗ рмПрмХ рмПрмХ рмпрм╖рнНрмЯрм┐, рмПрм╣рм┐рм░рнВрмкрнЗ рммрм╛рм░ рмпрм╖рнНрмЯрм┐ рмЧрнНрм░рм╣рмг рмХрм░; рмдрнБрморнНрмнрнЗ рмкрнНрм░рмдрнНрнЯрнЗрмХрм░ рмпрм╖рнНрмЯрм┐рм░рнЗ рмкрнНрм░рмдрнНрнЯрнЗрмХ рм▓рнЗрм╛рмХрм░ рмирм╛рмо рм▓рнЗрмЦ ред
3 рмкрнБрмгрм┐ рмдрнБрморнНрмнрнЗ рм▓рнЗрммрнАрм░ рмпрм╖рнНрмЯрм┐рм░рнЗ рм╣рм╛рм░рнЗрм╛рмгрм░ рмирм╛рмо рм▓рнЗрмЦрм┐рмм; рмХрм╛рм░рмг рм╕рнЗрморм╛рмирмЩрнНрмХ рмкрнНрм░рмдрнНрнЯрнЗрмХ рмкрм┐рмдрнГрмЧрнГрм╣рм░ рмЕрмзрнНрнЯрмХрнНрм╖ рмирм┐рмормирнНрмдрнЗ рмПрмХ рмПрмХ рмпрм╖рнНрмЯрм┐ рм╣рнЗрмм ред
4 рмЖрмЙ рм╕рморм╛рмЧрмо-рмдрморнНрм╡рнБрм░ рмпрнЗрмЙрмБ рм╕рнНрмерм╛рмирм░рнЗ рмЖрморнНрмнрнЗ рмдрнБрморнНрмнрморм╛рмирмЩрнНрмХ рм╕рм╣рм┐рмд рм╕рм╛рмХрнНрм╖рм╛рмд рмХрм░рнБ, рм╕рнЗрм╣рм┐ рм╕рнНрмерм╛рмирм░рнЗ рм╕рм╛рмХрнНрм╖рнНрнЯ-рм╕рм┐рмирнНрмжрнБрмХ рм╕рморнНрморнБрмЦрм░рнЗ рмдрнБрморнНрмнрнЗ рм╕рнЗрм╕рммрнБ рм░рмЦрм┐рмм ред
5 рмПрм╣рм╛ рмХрм▓рм╛ рмЙрмдрнНрмдрм╛рм░рнЗ, рмЖрморнНрмнрнЗ рмпрнЗрмЙрмБ рммрнНрнЯрмХрнНрмдрм┐рмХрм┐ рмормирнЗрм╛рмирнАрмд рмХрм░рм┐рммрм╛, рмдрм╛рм╣рм╛рм░ рмпрм╖рнНрмЯрм┐ рмкрнБрм╖рнНрмкрм┐рмд рм╣рнЗрмм; рмдрм╣рм┐рмБрм░рнЗ рмЗрм╕рнНрм░рм╛рмПрм▓-рм╕рмирнНрмдрм╛рмирмЧрмг рмдрнБрморнНрмнрморм╛рмирмЩрнНрмХ рммрм┐рм░рнБрмжрнНрмзрм░рнЗ рмпрнЗрмЙрмБ рммрмЪрм╕рм╛ рмХрм░рмирнНрмдрм┐, рм╕рнЗрм╣рм┐ рммрмЪрм╕рм╛ рмЖрморнНрмнрнЗ рмЖрмкрмгрм╛ рмирм┐рмХрмЯрм░рнБ рмирм┐рммрнГрмдрнНрмд рмХрм░рм╛рмЗрммрм╛ ред
6 рмПрмерм┐рм░рнЗ рморнЗрм╛рм╢рм╛ рмЗрм╕рнНрм░рм╛рмПрм▓-рм╕рмирнНрмдрм╛рмирмЧрмгрмХрнБ рмХрм╣рмирнНрмдрнЗ, рм╕рнЗрморм╛рмирмЩрнНрмХрм░ рмЕрмзрнНрнЯрмХрнНрм╖ рм╕рморм╕рнНрмдрнЗ рмЖрмкрмгрм╛ рмЖрмкрмгрм╛ рмкрм┐рмдрнГрмЧрнГрм╣ рмЕрмирнБрм╕рм╛рм░рнЗ рмкрнНрм░рмдрнНрнЯрнЗрмХ рмЕрмзрнНрнЯрмХрнНрм╖ рмирм┐рмормирнНрмдрнЗ рмПрмХ рмПрмХ рмпрм╖рнНрмЯрм┐, рмПрм░рнВрмкрнЗ рммрм╛рм░ рмпрм╖рнНрмЯрм┐ рмдрм╛рмЩрнНрмХрнБ рмжрнЗрм▓рнЗ; рмкрнБрмгрм┐ рм╣рм╛рм░рнЗрм╛рмгрмЩрнНрмХрм░ рмпрм╖рнНрмЯрм┐ рм╕рнЗрморм╛рмирмЩрнНрмХ рмпрм╖рнНрмЯрм┐рм╕рмХрм│рм░ рмормзрнНрнЯрм░рнЗ рмерм┐рм▓рм╛ ред
7 рмдрм╣рнБрмБ рморнЗрм╛рм╢рм╛ рм╕рм╛рмХрнНрм╖рнНрнЯрмдрморнНрм╡рнБрм░рнЗ рм╕рмжрм╛рмкрнНрм░рмнрнБрмЩрнНрмХ рм╕рморнНрморнБрмЦрм░рнЗ рм╕рнЗрм╣рм┐ рм╕рморм╕рнНрмд рмпрм╖рнНрмЯрм┐ рм░рмЦрм┐рм▓рнЗ ред
8 рмПрмерм┐ рмЙрмдрнНрмдрм╛рм░рнЗ рмЖрм░ рмжрм┐рми рморнЗрм╛рм╢рм╛ рм╕рм╛рмХрнНрм╖рнНрнЯрмдрморнНрм╡рнБрм░рнЗ рмкрнНрм░рммрнЗрм╢ рмХрм▓рнЗ; рмЖрмЙ рмжрнЗрмЦ, рм▓рнЗрммрнА рмЧрнГрм╣ рмирм┐рмормирнНрмдрнЗ рмерм┐рммрм╛ рм╣рм╛рм░рнЗрм╛рмгрмЩрнНрмХрм░ рмпрм╖рнНрмЯрм┐ рмЕрмЩрнНрмХрнБрм░рм┐рмд рм╣рнЗрм╛рмЗрмЕрмЫрм┐, рмкрнБрмгрм┐ рмЕрмЩрнНрмХрнБрм░ рммрм╛рм╣рм╛рм░ рм╣рнЗрм▓рм╛, рмкрнБрм╖рнНрмк рмлрнБрмЯрм┐рм▓рм╛ рмУ рмкрмХрнНрм╡ рммрм╛рмжрм╛рмо рмлрм│рм┐рм▓рм╛ ред
9 рмдрнЗрммрнЗ рморнЗрм╛рм╢рм╛ рм╕рмжрм╛рмкрнНрм░рмнрнБрмЩрнНрмХ рм╕рморнНрморнБрмЦрм░рнБ рм╕рнЗрм╣рм┐ рм╕рмХрм│ рмпрм╖рнНрмЯрм┐ рммрм╛рм╣рм╛рм░ рмХрм░рм┐ рмЗрм╕рнНрм░рм╛рмПрм▓рм░ рм╕рморм╕рнНрмд рм╕рмирнНрмдрм╛рмирмЧрмгрм░ рм╕рм╛рмХрнНрм╖рм╛рмдрмХрнБ рмЖрмгрм┐рм▓рнЗ; рмкрнБрмгрм┐ рм╕рнЗрморм╛рмирнЗ рмдрм╛рм╣рм╛ рмжрнЗрмЦрм┐ рмкрнНрм░рмдрнНрнЯрнЗрмХрнЗ рмЖрмкрмгрм╛ рмЖрмкрмгрм╛ рмпрм╖рнНрмЯрм┐ рмирнЗрм▓рнЗ ред
10 рмЕрмирмирнНрмдрм░ рм╕рмжрм╛рмкрнНрм░рмнрнБ рморнЗрм╛рм╢рм╛рмЩрнНрмХрнБ рмХрм╣рм┐рм▓рнЗ, рмЖрморнНрмн рммрм┐рм░рнБрмжрнНрмзрм░рнЗ рмПрм╣рм┐ рммрм┐рмжрнНрм░рнЗрм╛рм╣рнА рм╕рмирнНрмдрм╛рмирмЧрмгрм░ рммрмЪрм╕рм╛ рмпрнЗрмкрм░рм┐ рмирм┐рммрнГрмдрнНрмд рм╣рнБрмП рмУ рм╕рнЗрморм╛рмирмЩрнНрмХрм░ рморнГрмдрнНрнЯрнБ рми рм╣рнБрмП, рмПрмерм┐рмкрм╛рмЗрмБ рм╕рнЗрморм╛рмирмЩрнНрмХ рммрм┐рм░рнБрмжрнНрмзрм░рнЗ рмЪрм┐рм╣рнНрми рм╕рнНрм╡рм░рнВрмкрнЗ рм░рмЦрм╛рмпрм┐рммрм╛ рмирм┐рмормирнНрмдрнЗ рмдрнБрморнНрмнрнЗ рм╣рм╛рм░рнЗрм╛рмгрмЩрнНрмХ-рмпрм╖рнНрмЯрм┐ рм╕рм╛рмХрнНрм╖рнНрнЯ-рм╕рм┐рмирнНрмжрнБрмХ рм╕рморнНрморнБрмЦрм░рнЗ рм░рмЦ ред
11 рморнЗрм╛рм╢рм╛ рм╕рнЗрм░рнВрмк рмХрм▓рнЗ; рм╕рмжрм╛рмкрнНрм░рмнрнБ рмдрм╛рмЩрнНрмХрнБ рмпрнЗрмкрм░рм┐ рмЖрмЬрнНрмЮрм╛ рмжрнЗрм▓рнЗ, рм╕рнЗ рм╕рнЗрм╣рм┐рмкрм░рм┐ рмХрм▓рнЗ ред
12 рмПрмерм┐ рмЙрмдрнНрмдрм╛рм░рнЗ рмЗрм╕рнНрм░рм╛рмПрм▓-рм╕рмирнНрмдрм╛рмирмЧрмг рморнЗрм╛рм╢рм╛рмЩрнНрмХрнБ рмХрм╣рм┐рм▓рнЗ, рмжрнЗрмЦ, рмЖрморнНрмнрморм╛рмирмЩрнНрмХрм░ рмкрнНрм░рм╛рмг рмпрм╛рмЙрмЫрм┐, рмЖрморнНрмнрнЗрморм╛рмирнЗ рмЙрмЪрнНрмЫрм┐рмирнНрми рм╣рнЗрмЙ, рмЖрморнНрмнрнЗ рм╕рморм╕рнНрмдрнЗ рмЙрмЪрнНрмЫрм┐рмирнНрми рм╣рнЗрмЙ ред
13 рмпрнЗрмХрнЗрм╣рм┐ рмирм┐рмХрмЯрмХрнБ рмЖрм╕рнБрмЕрмЫрм┐, рмЕрм░рнНрмерм╛рмдрнН, рм╕рмжрм╛рмкрнНрм░рмнрнБрмЩрнНрмХ рмЖрммрм╛рм╕ рмирм┐рмХрмЯрмХрнБ рмЖрм╕рнБрмЕрмЫрм┐, рм╕рнЗ рморм░рнБрмЕрмЫрм┐; рмЖрморнНрмнрнЗ рм╕рморм╕рнНрмдрнЗ рмХрм┐ рмкрнНрм░рм╛рмг рмЫрм╛рнЬрм┐ рмЙрмЪрнНрмЫрм┐рмирнНрми рм╣рнЗрммрм╛рмг?