1 vnumber="1"> ושרי אשת אברם לא ילדה לו ולה שפחה מצרית ושמה הגר
2 vnumber="2"> ותאמר שרי אל אברם הנה נא עצרני יהוה מלדת--בא נא אל שפחתי אולי אבנה ממנה וישמע אברם לקול שרי
3 vnumber="3"> ותקח שרי אשת אברם את הגר המצרית שפחתה מקץ עשר שנים לשבת אברם בארץ כנען ותתן אתה לאברם אישה לו לאשה
4 vnumber="4"> ויבא אל הגר ותהר ותרא כי הרתה ותקל גברתה בעיניה
5 vnumber="5"> ותאמר שרי אל אברם חמסי עליך--אנכי נתתי שפחתי בחיקך ותרא כי הרתה ואקל בעיניה ישפט יהוה ביני וביניך
6 vnumber="6"> ויאמר אברם אל שרי הנה שפחתך בידך--עשי לה הטוב בעיניך ותענה שרי ותברח מפניה
7 vnumber="7"> וימצאה מלאך יהוה על עין המים--במדבר על העין בדרך שור
8 vnumber="8"> ויאמר הגר שפחת שרי אי מזה באת--ואנה תלכי ותאמר--מפני שרי גברתי אנכי ברחת
9 vnumber="9"> ויאמר לה מלאך יהוה שובי אל גברתך והתעני תחת ידיה
10 vnumber="10"> ויאמר לה מלאך יהוה הרבה ארבה את זרעך ולא יספר מרב
11 vnumber="11"> ויאמר לה מלאך יהוה הנך הרה וילדת בן וקראת שמו ישמעאל כי שמע יהוה אל עניך
12 vnumber="12"> והוא יהיה פרא אדם--ידו בכל ויד כל בו ועל פני כל אחיו ישכן
13 vnumber="13"> ותקרא שם יהוה הדבר אליה אתה אל ראי כי אמרה הגם הלם ראיתי--אחרי ראי
14 vnumber="14"> על כן קרא לבאר באר לחי ראי--הנה בין קדש ובין ברד
15 vnumber="15"> ותלד הגר לאברם בן ויקרא אברם שם בנו אשר ילדה הגר ישמעאל
16 vnumber="16"> ואברם בן שמנים שנה ושש שנים בלדת הגר את ישמעאל לאברם {ס}
art="x-p"/>