1 vnumber="1"> וירא בלעם כי טוב בעיני יהוה לברך את ישראל ולא הלך כפעם בפעם לקראת נחשים וישת אל המדבר פניו
2 vnumber="2"> וישא בלעם את עיניו וירא את ישראל שכן לשבטיו ותהי עליו רוח אלהים
3 vnumber="3"> וישא משלו ויאמר נאם בלעם בנו בער ונאם הגבר שתם העין
4 vnumber="4"> נאם--שמע אמרי אל אשר מחזה שדי יחזה נפל וגלוי עינים
5 vnumber="5"> מה טבו אהליך יעקב משכנתיך ישראל
6 vnumber="6"> כנחלים נטיו כגנת עלי נהר כאהלים נטע יהוה כארזים עלי מים
7 vnumber="7"> יזל מים מדליו וזרעו במים רבים וירם מאגג מלכו ותנשא מלכתו
8 vnumber="8"> אל מוציאו ממצרים כתועפת ראם לו יאכל גוים צריו ועצמתיהם יגרם--וחציו ימחץ
9 vnumber="9"> כרע שכב כארי וכלביא מי יקימנו מברכיך ברוך וארריך ארור
10 vnumber="10"> ויחר אף בלק אל בלעם ויספק את כפיו ויאמר בלק אל בלעם לקב איבי קראתיך והנה ברכת ברך זה שלש פעמים
11 vnumber="11"> ועתה ברח לך אל מקומך אמרתי כבד אכבדך והנה מנעך יהוה מכבוד
12 vnumber="12"> ויאמר בלעם אל בלק הלא גם אל מלאכיך אשר שלחת אלי--דברתי לאמר
13 vnumber="13"> אם יתן לי בלק מלא ביתו כסף וזהב--לא אוכל לעבר את פי יהוה לעשות טובה או רעה מלבי אשר ידבר יהוה אתו אדבר
14 vnumber="14"> ועתה הנני הולך לעמי לכה איעצך אשר יעשה העם הזה לעמך באחרית הימים
15 vnumber="15"> וישא משלו ויאמר נאם בלעם בנו בער ונאם הגבר שתם העין
16 vnumber="16"> נאם שמע אמרי אל וידע דעת עליון מחזה שדי יחזה נפל וגלוי עינים
17 vnumber="17"> אראנו ולא עתה אשורנו ולא קרוב דרך כוכב מיעקב וקם שבט מישראל ומחץ פאתי מואב וקרקר כל בני שת
18 vnumber="18"> והיה אדום ירשה והיה ירשה שעיר--איביו וישראל עשה חיל
19 vnumber="19"> וירד מיעקב והאביד שריד מעיר
20 vnumber="20"> וירא את עמלק וישא משלו ויאמר ראשית גוים עמלק ואחריתו עדי אבד
21 vnumber="21"> וירא את הקיני וישא משלו ויאמר איתן מושבך ושים בסלע קנך
22 vnumber="22"> כי אם יהיה לבער קין--עד מה אשור תשבך
23 vnumber="23"> וישא משלו ויאמר אוי מי יחיה משמו אל
24 vnumber="24"> וצים מיד כתים וענו אשור וענו עבר וגם הוא עדי אבד
25 vnumber="25"> ויקם בלעם וילך וישב למקמו וגם בלק הלך לדרכו {פ}
art="x-p"/>