1 рмЖрморнЛрм╕рм░ рмкрнБрмдрнНрм░ рмпрм┐рм╢рм╛рмЗрнЯрмЩрнНрмХрм░ рмжрм░рнНрм╢рми, рм╕рнЗ рмпрм┐рм╣рнБрмжрм╛ рм░рм╛рмЬрм╛рмЧрмг рмЙрм╖рнАрнЯ, рмпрнЛрмерморнНтАН, рмЖрм╣рм╕рнНтАМ рмУ рм╣рм┐рмЬрмХрнАрнЯрм░ рм░рм╛рмЬрмдрнНрм╡ рм╕рморнЯрм░рнЗ рмпрм┐рм╣рнБрмжрм╛ рмУ рмпрм┐рм░рнВрм╢рм╛рм▓рмо рммрм┐рм╖рнЯрм░рнЗ рмПрм╣рм┐ рмжрм░рнНрм╢рми рмкрм╛рмЗрм▓рнЗред
2 {рмИрм╢рнНрн▒рм░рмЩрнНрмХ рмЕрмирнБрмпрнЛрмЧ} PS рм╣рнЗ рмЖрмХрм╛рм╢рмормгрнНрмбрм│, рм╢рнБрмг, рм╣рнЗ рмкрнГрмерм┐рммрнА, рмХрм░рнНрмгрнНрмгрмкрм╛рмд рмХрм░, рмХрм╛рм░рмг рм╕рмжрм╛рмкрнНрм░рмнрнБ рмХрм╣рм┐рмЕрмЫрмирнНрмдрм┐;
тАЬрмЖрморнНрмнрнЗ рм╕рмирнНрмдрм╛рмирмЧрмгрмХрнБ рмкрнНрм░рмдрм┐рмкрм╛рм│рми рмУ рмнрм░рмгрмкрнЛрм╖рмг рмХрм░рм┐рмЕрмЫрнБ,
рморм╛рмдрнНрм░ рм╕рнЗрморм╛рмирнЗ рмЖрморнНрмнрм░ рммрм┐рмжрнНрм░рнЛрм╣рм╛рмЪрм░рмг рмХрм░рм┐рмЕрмЫрмирнНрмдрм┐редтАЭ
3 рмЧрнЛрм░рнБ рмЖрмкрмгрм╛ рмЦрм╛рмЙрмирнНрмжрмХрнБ рмУ рмЧрм░рнНрмжрнНрмжрмн рмЖрмкрмгрм╛ рмХрм░рнНрмдрнНрмдрм╛рм░ рмХрнБрмгрнНрмбрмХрнБ рмЪрм┐рм╣рнНрмирнЗ;
рморм╛рмдрнНрм░ рмЗрм╕рнНрм░рм╛рмПрм▓ рмЬрм╛рмгрнЗ рмирм╛рм╣рм┐рмБ, рмЖрморнНрмнрм░ рм▓рнЛрмХрморм╛рмирнЗ рммрм┐рммрнЗрмЪрмирм╛ рмХрм░рмирнНрмдрм┐ рмирм╛рм╣рм┐рмБред
4 рмЖрм╣рм╛ рмкрм╛рмкрм┐рм╖рнНрма рмЧрнЛрм╖рнНрмарнА, рмЕрмзрм░рнНрморм░рнЗ рмнрм╛рм░рмЧрнНрм░рм╕рнНрмд рм▓рнЛрмХрнЗ,
рмжрнБрм╖рнНрмХрм░рнНрмормХрм╛рм░рнАрморм╛рмирмЩрнНрмХ рммрмВрм╢, рмнрнНрм░рм╖рнНрмЯрм╛рмЪрм╛рм░рнА рм╕рмирнНрмдрм╛рмирмЧрмг !
рм╕рнЗрморм╛рмирнЗ рм╕рмжрм╛рмкрнНрм░рмнрнБрмЩрнНрмХрнБ рмкрм░рм┐рмдрнНрнЯрм╛рмЧ рмХрм░рм┐рмЕрмЫрмирнНрмдрм┐, рм╕рнЗрморм╛рмирнЗ рмЗрм╕рнНрм░рм╛рмПрм▓рм░ рмзрм░рнНрморм╕рнНрн▒рм░рнВрмкрмЩрнНрмХрнБ рмЕрммрмЬрнНрмЮрм╛ рмХрм░рм┐рмЕрмЫрмирнНрмдрм┐,
рм╕рнЗрморм╛рмирнЗ рммрм┐рморнБрмЦ рм╣рнЛрмЗ рмкрмЫрмХрнБ рмЪрм╛рм▓рм┐ рмпрм╛рмЗрмЕрмЫрмирнНрмдрм┐ред
5 рмдрнБрморнНрмнрнЗрморм╛рмирнЗ рмЕрмзрм┐рмХ рмЕрмзрм┐рмХ рммрм┐рмжрнНрм░рнЛрм╣рм╛рмЪрм░рмг рмХрм░рм┐рммрм╛ рмкрм╛рмЗрмБ рмХрм╛рм╣рм┐рмБрмХрм┐ рмЖрм╣рнБрм░рм┐ рмкрнНрм░рм╣рм╛рм░рм┐рмд рм╣рнЗрмм ?
рморм╕рнНрмдрмХрмпрм╛рмХ рмкрнАрмбрм╝рм┐рмд рмУ рм╕рморнБрмжрм╛рнЯ рм╣рнГрмжрнЯ рмжрнБрм░рнНрммрм│ рм╣рнЛрмЗрмЕрмЫрм┐ред
6 рмкрм╛рмжрм░ рмдрм│рмарм╛рм░рнБ рморм╕рнНрмдрмХ рмкрм░рнНрмпрнНрнЯрмирнНрмд рмХрм┐рмЫрм┐ рм╕рнНрн▒рм╛рм╕рнНрмернНрнЯ рмирм╛рм╣рм┐рмБ;
рмХрнЗрммрм│ рмХрнНрм╖рмд, рмжрм╛рмЧ рмУ рмкрнВрмЬрмкрнВрм░рнНрмгрнНрмг рмШрм╛; рм╕рнЗрм╣рм┐рм╕рммрнБ рмЯрм┐рмкрм╛ рмХрм┐рморнНрммрм╛ рммрмирнНрмзрм╛ рмпрм╛рмЗ рмирм╛рм╣рм┐рмБ, рмХрм┐рмЕрммрм╛ рмдрнИрм│ рмжрнНрн▒рм╛рм░рм╛ рмХрнЛрморм│ рмХрм░рм╛рмпрм╛рмЗ рмирм╛рм╣рм┐рмБред
7 рмдрнБрморнНрмнрморм╛рмирмЩрнНрмХрм░ рмжрнЗрм╢ рмзрнНрн▒рмВрм╕рм╕рнНрмерм╛рми; рмдрнБрморнНрмнрморм╛рмирмЩрнНрмХрм░ рмирмЧрм░рм╕рммрнБ рмЕрмЧрнНрмирм┐рм░рнЗ рмжрмЧрнНрмз;
рмдрнБрморнНрмнрморм╛рмирмЩрнНрмХрм░ рмнрнВрморм┐ рммрм┐рмжрнЗрм╢рнАрморм╛рмирнЗ рмдрнБрморнНрмнрморм╛рмирмЩрнНрмХрм░ рм╕рм╛рмХрнНрм╖рм╛рмдрм░рнЗ рмЧрнНрм░рм╛рм╕ рмХрм░рмирнНрмдрм┐,
рмдрм╛рм╣рм╛ рммрм┐рмжрнЗрм╢рнАрморм╛рмирмЩрнНрмХ рмжрнНрн▒рм╛рм░рм╛ рммрм┐рмирм╖рнНрмЯ рм╣рнЗрммрм╛ рмдрнБрм▓рнНрнЯ рмзрнНрн▒рмВрм╕рм╕рнНрмерм╛рми рм╣рнЛрмЗрмЕрмЫрм┐ред
8 рмкрнБрмгрм┐, рм╕рм┐рнЯрнЛрмирм░ рмХрмирнНрнЯрм╛ рмжрнНрм░рм╛рмХрнНрм╖рм╛рмХрнНрм╖рнЗрмдрнНрм░рм░ рмХрнБрмЯрнАрм░,
рмХрм╛рмХрнБрмбрм╝рм┐рмХрнНрм╖рнЗрмдрнНрм░рм░ рммрм╕рм╛, рмЕрммрм░рнБрмжрнНрмз рмирмЧрм░ рмдрнБрм▓рнНрнЯ рм╣рнЛрмЗ рм░рм╣рм┐рмЕрмЫрм┐ред
9 рм╕рнИрмирнНрнЯрм╛рмзрм┐рмкрмдрм┐ рм╕рмжрм╛рмкрнНрм░рмнрнБ рмЖрморнНрмнрморм╛рмирмЩрнНрмХ рмкрм╛рмЗрмБ рмЕрмдрм┐ рмЕрм│рнНрмк рм▓рнЛрмХ рмЕрммрм╢рм┐рм╖рнНрмЯ рм░рмЦрм┐ рми рмерм┐рм▓рнЗ,
рмЖрморнНрмнрнЗрморм╛рмирнЗ рм╕рмжрнЛрморм░ рмдрнБрм▓рнНрнЯ рм╣рнЛрмЗрмерм╛тАЩрмирнНрмдрнБ, рмЖрморнНрмнрнЗрморм╛рмирнЗ рм╣рморнЛрм░рм╛рм░ рмдрнБрм▓рнНрнЯ рм╣рнЛрмЗрмерм╛тАЩрмирнНрмдрнБред
10 рм╣рнЗ рм╕рмжрнЛрморм░ рм╢рм╛рм╕рмирмХрм░рнНрмдрнНрмдрм╛рморм╛рмирнЗ, рм╕рмжрм╛рмкрнНрм░рмнрнБрмЩрнНрмХрм░ рммрм╛рмХрнНрнЯ рм╢рнБрмг,
рм╣рнЗ рм╣рморнЛрм░рм╛рм░ рм▓рнЛрмХрморм╛рмирнЗ, рмдрнБрморнНрмнрнЗрморм╛рмирнЗ рмЖрморнНрмнрморм╛рмирмЩрнНрмХ рмкрм░рморнЗрм╢рнНрн▒рм░рмЩрнНрмХ рммрнНрнЯрммрм╕рнНрмерм╛рм░рнЗ рмХрм░рнНрмгрнНрмгрмкрм╛рмд рмХрм░ред
11 рм╕рмжрм╛рмкрнНрм░рмнрнБ рмХрм╣рмирнНрмдрм┐, тАЬрмЖрморнНрмн рмЙрмжрнНрмжрнЗрм╢рнНрнЯрм░рнЗ рмдрнБрморнНрмнрморм╛рмирмЩрнНрмХ рмЕрмкрм╛рм░ рммрм│рм┐рмжрм╛рмирм░ рмЕрмнрм┐рмкрнНрм░рм╛рнЯ рмХрмЕрмг ?тАЭ
тАЬрмЖрморнНрмнрнЗ рморнЗрм╖рмЧрмгрм░ рм╣рнЛрморммрм│рм┐рм░рнЗ рмУ рмкрнБрм╖рнНрмЯ рмкрм╢рнБрмЧрмгрм░ рморнЗрмжрм░рнЗ рмкрнВрм░рнНрмгрнНрмг рм╣рнЛрмЗрмЕрмЫрнБ;
рмкрнБрмгрм┐, рммрнГрм╖ рмХрм┐рморнНрммрм╛ рморнЗрм╖ рмХрм┐рморнНрммрм╛ рмЫрм╛рмЧрм│рморм╛рмирмЩрнНрмХ рм░рмХрнНрмдрм░рнЗ рмЖрморнНрмнрм░ рмдрнБрм╖рнНрмЯрм┐ рмирм╛рм╣рм┐рмБред
12 рмдрнБрморнНрмнрнЗрморм╛рмирнЗ рмЖрморнНрмн рм╕рморнНрморнБрмЦрм░рнЗ рмЙрмкрм╕рнНрмерм┐рмд рм╣рнЗрммрм╛ рммрнЗрм│рнЗ
рмЖрморнНрмнрм░ рмкрнНрм░рм╛рмЩрнНрмЧрмгрм╕рмХрм│ рмкрмж рмдрм│рнЗ рмжрм│рм┐рммрм╛ рмкрм╛рмЗрмБ рмХрм┐рмП рмдрнБрморнНрмнрморм╛рмирмЩрнНрмХрмарм╛рм░рнБ рмЪрм╛рм╣рм┐рмБрмЕрмЫрм┐ ?
13 рмЕрм╕рм╛рм░ рмирнИрммрнЗрмжрнНрнЯ рмЖрмЙ рмЖрмг рмирм╛рм╣рм┐рмБ; рмзрнВрмкрмжрм╛рм╣ рмЖрморнНрмнрм░ рмШрнГрмгрм┐рмд;
рмдрнБрморнНрмнрм░ рмЕрморм╛рммрм╛рм╕рнНрнЯрм╛ рмУ рммрм┐рм╢рнНрм░рм╛рморммрм╛рм░, рм╕рмнрм╛рм░ рмШрнЛрм╖рмгрм╛ рмПрм╣рм┐ рмЕрмзрм░рнНрмо рмУ рморм╣рм╛рм╕рмнрм╛ рмЖрморнНрмнрнЗ рм╕рм╣рм┐ рмкрм╛рм░рнБ рмирм╛рм╣рнБрмБред
14 рмЖрморнНрмн рмкрнНрм░рм╛рмг рмдрнБрморнНрмнрморм╛рмирмЩрнНрмХрм░ рмЕрморм╛рммрм╛рм╕рнНрнЯрм╛ рмУ рмирм┐рм░рнВрмкрм┐рмд рмкрм░рнНрммрм╕рммрнБ рмШрнГрмгрм╛ рмХрм░рнЗ;
рм╕рнЗрм╣рм┐рм╕рммрнБ рмЖрморнНрмн рмкрнНрм░рмдрм┐ рмХрнНрм▓рнЗрм╢рмХрм░; рмЖрморнНрмнрнЗ рм╕рнЗрм╣рм┐рм╕рммрнБ рммрм╣рм┐рммрм╛рмХрнБ рмХрнНрм│рм╛рмирнНрмд рм╣рнЛрмЗрмЕрмЫрнБред
15 рмкрнБрмгрм┐, рмдрнБрморнНрмнрнЗрморм╛рмирнЗ рмЖрмкрмгрм╛рморм╛рмирмЩрнНрмХрм░ рм╣рм╕рнНрмд рмкрнНрм░рм╕рм╛рм░ рмХрм▓рм╛ рммрнЗрм│рнЗ рмЖрморнНрмнрнЗ рмдрнБрморнНрмнрморм╛рмирмЩрнНрмХрмарм╛рм░рнБ рмЖрмкрмгрм╛ рмЪрмХрнНрм╖рнБ рмЖрмЪрнНрмЫрм╛рмжрми рмХрм░рм┐рммрм╛;
рмЖрм╣рнБрм░рм┐, рмдрнБрморнНрмнрнЗрморм╛рмирнЗ рмЕрмирнЗрмХ рмкрнНрм░рм╛рм░рнНрмермирм╛ рмХрм▓рм╛ рммрнЗрм│рнЗ рмЖрморнНрмнрнЗ рм╢рнБрмгрм┐рммрм╛ рмирм╛рм╣рм┐рмБред
рмдрнБрморнНрмнрморм╛рмирмЩрнНрмХ рм╣рм╕рнНрмд рм░рмХрнНрмдрм░рнЗ рмкрм░рм┐рмкрнВрм░рнНрмгрнНрмгред
16 рмдрнБрморнНрмнрнЗрморм╛рмирнЗ рмЖрмкрмгрм╛рморм╛рмирмЩрнНрмХрнБ рмзрнМрмд рмХрм░, рмЖрмкрмгрм╛рморм╛рмирмЩрнНрмХрнБ рм╢рнБрмЪрм┐ рмХрм░;
рмЖрморнНрмн рмжрнГрм╖рнНрмЯрм┐рм░рнБ рмЖрмкрмгрм╛рморм╛рмирмЩрнНрмХрм░ рмХрнНрм░рм┐рнЯрм╛рм░ рмормирнНрмжрмдрм╛ рмжрнВрм░ рмХрм░;
рмХрнБрмХрнНрм░рм┐рнЯрм╛ рмХрм░рм┐рммрм╛рм░рнБ рмирм┐рммрнГрмдрнНрмд рм╣рнБрмЕ;
17 рм╕рнБрмХрнНрм░рм┐рнЯрм╛ рмХрм░рм┐рммрм╛рмХрнБ рм╢рм┐рмЦ;
рмирнНрнЯрм╛рнЯрммрм┐рмЪрм╛рм░ рмЪрнЗрм╖рнНрмЯрм╛ рмХрм░, рмЙрмкрмжрнНрм░рммрмЧрнНрм░рм╕рнНрмдрморм╛рмирмЩрнНрмХрм░ рм╕рм╛рм╣рм╛рмпрнНрнЯ рмХрм░,
рмкрм┐рмдрнГрм╣рнАрмирморм╛рмирмЩрнНрмХрм░ рмирнНрнЯрм╛рнЯ рммрм┐рмЪрм╛рм░ рмХрм░, рммрм┐рмзрммрм╛рморм╛рмирмЩрнНрмХ рмкрмХрнНрм╖рм░рнЗ рмкрнНрм░рмдрм┐рммрм╛рмж рмХрм░редтАЭ
18 рм╕рмжрм╛рмкрнНрм░рмнрнБ рмХрм╣рмирнНрмдрм┐, рмЖрм╕, рмЖрморнНрмнрнЗрморм╛рмирнЗ рмЙрмдрнНрмдрм░ рмкрнНрм░рмдрнНрнЯрнБрмдрнНрмдрм░ рмХрм░рнБ;
рмдрнБрморнНрмнрморм╛рмирмЩрнНрмХрм░ рмкрм╛рмкрм╕рммрнБ рм╕рм┐рмирнНрмжрнВрм░рммрм░рнНрмгрнНрмг рмкрм░рм┐ рм╣рнЗрм▓рнЗ рм╣рнЗрмБ рм╣рм┐рмо рмкрм░рм┐ рм╢рнБрмХрнНрм│рммрм░рнНрмгрнНрмг рм╣рнЗрмм;
рм╕рнЗрм╣рм┐рм╕рммрнБ рм▓рнЛрм╣рм┐рмдрммрм░рнНрмгрнНрмг рмкрм░рм┐ рм░рмЩрнНрмЧ рм╣рнЗрм▓рнЗ рм╣рнЗрмБ рморнЗрм╖рм▓рнЛрмо рмкрм░рм┐ рм╣рнЗрммред
19 рмпрмжрм┐ рмдрнБрморнНрмнрнЗрморм╛рмирнЗ рм╕рморнНрмормд рмУ рмЖрмЬрнНрмЮрм╛рммрм╣ рм╣рнЗрмм, рмдрнЗрммрнЗ рмжрнЗрм╢рм░ рмЙрмдрнНрмдрмо рмлрм│ рмнрнЛрмЧ рмХрм░рм┐рммред
20 рморм╛рмдрнНрм░ рмпрмжрм┐ рмдрнБрморнНрмнрнЗрморм╛рмирнЗ рмЕрм╕рморнНрмормд рмУ рммрм┐рм░рнБрмжрнНрмзрм╛рмЪрм╛рм░рнА рм╣рнЗрмм, рмдрнЗрммрнЗ рмЦрмбрнНрмЧрмнрнБрмХрнНрмд рм╣рнЗрмм;
рмХрм╛рм░рмг рм╕рмжрм╛рмкрнНрм░рмнрнБрмЩрнНрмХ рморнБрмЦ рмПрм╣рм╛ рмХрм╣рм┐рмЕрмЫрм┐ред PS
21 {рмкрм╛рмкрмкрнВрм░рнНрмгрнНрмг рмирмЧрм░рнА} PS рммрм┐рм╢рнНрн▒рм╕рнНрмд рмирмЧрм░рнА рмХрм┐рмкрм░рм┐ рммрнЗрм╢рнНрнЯрм╛ рм╣рнЛрмЗрмЕрмЫрм┐ ! рм╕рнЗ рмирнНрнЯрм╛рнЯрммрм┐рмЪрм╛рм░рм░рнЗ рмкрнВрм░рнНрмгрнНрмгрм╛ рмерм┐рм▓рм╛ред рмзрм░рнНрмо рмдрм╛рм╣рм╛ рмормзрнНрнЯрм░рнЗ рммрм╛рм╕ рмХрм▓рм╛, рморм╛рмдрнНрм░ рмПрммрнЗ рм╣рмдрнНрнЯрм╛рмХрм╛рм░рнАрморм╛рмирнЗ рмЕрмЫрмирнНрмдрм┐ред
22 рмдрнБрморнНрмнрм░ рм░рнВрмкрм╛ рмЦрм╛рмж рм╣рнЛрмЗрмЕрмЫрм┐, рмдрнБрморнНрмнрм░ рмжрнНрм░рм╛рмХрнНрм╖рм╛рм░рм╕ рмЬрм│рморм┐рм╢рнНрм░рм┐рмд рм╣рнЛрмЗрмЕрмЫрм┐ред
23 рмдрнБрморнНрмнрм░ рмЕрмзрм┐рмкрмдрм┐рморм╛рмирнЗ рммрм┐рмжрнНрм░рнЛрм╣рнА рмУ рмЪрнЛрм░рморм╛рмирмЩрнНрмХрм░ рм╕рмЦрм╛; рмкрнНрм░рмдрнНрнЯрнЗрмХрнЗ рм▓рм╛рмЮрнНрмЪ рмнрм▓ рмкрм╛тАЩрмирнНрмдрм┐ рмУ рмкрм╛рм░рм┐рмдрнЛрм╖рм┐рмХрм░ рмкрм╢рнНрмЪрм╛рмжрнНтАНрммрм░рнНрмдрнНрмдрнА рм╣рнБрмЕрмирнНрмдрм┐; рм╕рнЗрморм╛рмирнЗ рмкрм┐рмдрнГрм╣рнАрмирморм╛рмирмЩрнНрмХрм░ рммрм┐рмЪрм╛рм░ рмХрм░рмирнНрмдрм┐ рмирм╛рм╣рм┐рмБ, рмХрм┐рмЕрммрм╛ рммрм┐рмзрммрм╛рм░ рмЧрнБрм╣рм╛рм░рм┐ рм╕рнЗрморм╛рмирмЩрнНрмХ рмирм┐рмХрмЯрмХрнБ рмЖрм╕рнЗ рмирм╛рм╣рм┐рмБред
24 рмПрм╣рнЗрмдрнБ рмкрнНрм░рмнрнБ, рм╕рнИрмирнНрнЯрм╛рмзрм┐рмкрмдрм┐ рм╕рмжрм╛рмкрнНрм░рмнрнБ, рмЗрм╕рнНрм░рм╛рмПрм▓рм░ рммрм│рмжрм╛рмдрм╛ рмХрм╣рмирнНрмдрм┐, рм╢рнБрмг, рмЖрморнНрмнрнЗ рмЖрмкрмгрм╛ рммрм┐рмкрмХрнНрм╖рмЧрмг рммрм┐рм╖рнЯрм░рнЗ рмЖрм░рм╛рмо рмкрм╛рмЗрммрм╛ рмУ рмЖрморнНрмнрнЗ рмЖрмкрмгрм╛ рм╢рмдрнНрм░рнБрмЧрмгрмарм╛рм░рнБ рмкрм░рм┐рм╢рнЛрмз рмирнЗрммрм╛;
25 рмкрнБрмгрм┐, рмЖрморнНрмнрнЗ рмдрнБрморнНрмнрмЖрмбрм╝рнЗ рмЖрмкрмгрм╛ рм╣рм╕рнНрмд рмлрнЗрм░рм╛рмЗ рмдрнБрморнНрмнрм░ рмЦрм╛рмж рм╕рморнНрмкрнВрм░рнНрмгрнНрмг рм░рнВрмкрнЗ рмкрм░рм┐рм╖рнНрмХрм╛рм░ рмХрм░рм┐рммрм╛ рмУ рмдрнБрморнНрмнрм░ рм╕рнАрм╕рм╛рм╕рммрнБ рмХрм╛рмврм╝рм┐ рмирнЗрммрм╛;
26 рмЖрмЙ, рмЖрморнНрмнрнЗ рмкрнВрм░рнНрмм рмХрм╛рм│ рмкрм░рм┐ рмдрнБрморнНрмнрм░ рммрм┐рмЪрм╛рм░рмХрм░рнНрмдрнНрмдрнГрмЧрмгрмЩрнНрмХрнБ рмУ рмЖрмжрнНрнЯ рм╕рморнЯ рмкрм░рм┐ рмдрнБрморнНрмн рмормирнНрмдрнНрм░рнАрмЧрмгрмЩрнНрмХрнБ рмкрнБрмирмГрм╕рнНрмерм╛рмкрми рмХрм░рм┐рммрм╛; рмдрм╣рм┐рмБ рмЙрмдрнНрмдрм╛рм░рнБ рмдрнБрморнНрмнрнЗ рмзрм░рнНрмормкрнБрм░рнА, рммрм┐рм╢рнНрн▒рм╕рнНрмд рмирмЧрм░рнА рммрнЛрм▓рм┐ рммрм┐рмЦрнНрнЯрм╛рмд рм╣рнЗрммред
27 рм╕рм┐рнЯрнЛрми рмирнНрнЯрм╛рнЯрммрм┐рмЪрм╛рм░ рмжрнНрн▒рм╛рм░рм╛ рмУ рмдрм╛рм╣рм╛рм░ рмлрнЗрм░рм┐ рмЖрм╕рм┐рммрм╛ рм▓рнЛрмХрморм╛рмирнЗ рмзрм╛рм░рнНрморм┐рмХрмдрм╛ рмжрнНрн▒рм╛рм░рм╛ рморнБрмХрнНрмдрм┐ рмкрм╛рмЗрммрнЗред
28 рморм╛рмдрнНрм░ рмЕрмзрм░рнНрморм╛рмЪрм╛рм░рнА рмУ рмкрм╛рмкрнАрморм╛рмирнЗ рмПрмХрмдрнНрм░ рммрм┐рмирм╖рнНрмЯ рм╣рнЗрммрнЗ рмУ рмпрнЗрмЙрмБрморм╛рмирнЗ рм╕рмжрм╛рмкрнНрм░рмнрнБрмЩрнНрмХрнБ рмкрм░рм┐рмдрнНрнЯрм╛рмЧ рмХрм░рмирнНрмдрм┐, рм╕рнЗрморм╛рмирнЗ рм╕рмВрм╣рм╛рм░рм┐рмд рм╣рнЗрммрнЗред
29 рмХрм╛рм░рмг рм╕рнЗрморм╛рмирнЗ рмдрнБрморнНрмнрморм╛рмирмЩрнНрмХрм░ рммрм╛рмЮрнНрмЫрм┐рмд рмЕрм▓рнЛрмирнНтАН рммрнГрмХрнНрм╖ рммрм┐рм╖рнЯрм░рнЗ рм▓рмЬрнНрмЬрм┐рмд рм╣рнЗрммрнЗ, рмкрнБрмгрм┐, рмдрнБрморнНрмнрнЗрморм╛рмирнЗ рмЖрмкрмгрм╛рморм╛рмирмЩрнНрмХрм░ рмормирнЛрмирнАрмд рмЙрмжрнНрнЯрм╛рмирм╕рмХрм│рм░ рммрм┐рм╖рнЯрм░рнЗ рм╣рмдрм╛рм╢ рм╣рнЗрммред
30 рмпрнЗрм╣рнЗрмдрнБ рмдрнБрморнНрмнрнЗрморм╛рмирнЗ рм╢рнБрм╖рнНрмХрмкрмдрнНрм░ рмЕрм▓рнЛрмирнНтАН рммрнГрмХрнНрм╖ рмУ рмирм┐рм░рнНрмЬрм│ рмЙрмжрнНрнЯрм╛рми рмдрнБрм▓рнНрнЯ рм╣рнЗрммред
31 рмкрнБрмгрм┐, рммрм│рммрм╛рми рм▓рнЛрмХ рмЫрмгрмкрмЯ рмкрм░рм┐ рмУ рмдрм╛рм╣рм╛рм░ рмХрм░рнНрмо рмЕрмЧрнНрмирм┐рмХрмгрм╛ рмкрм░рм┐ рм╣рнЗрмм; рм╕рнЗ рмжрнБрмЗ рмПрмХрмдрнНрм░ рмЬрнНрн▒рм│рм┐рмм рмУ рмХрнЗрм╣рм┐ рмдрм╛рм╣рм╛ рм▓рм┐рмнрм╛рмЗрмм рмирм╛рм╣рм┐рмБред PE